Monday, October 24, 2011

كان نفسي تضعفي















كان نفسي تضعفي
تخديني في حضنك
لحظة وداعنا
يوم جنازة حبي ليكي
يوم ما بدفن قلبي فيكي
كان نفسي تضعفي و تندهيني
بس السكات كان الختام
و انا ياما كنت بكره سكاتك
بكره فيك السكون
لما أكون
عاوزك تثوري
بكره فيك دمعتك و
حزنك المكتوم
لكن مشينا
ومشيت معايا الذكريات
من غير سؤال
من غير دموع
في عنيا ليك
من غير ما عرف بعد
النهارده حاجة عنك
رغم كل الفرق بينا
الفرق الكبييييييييير
بين مصيري وبين مصيرك
رغم إني كنت عارف إن النهاية
شيء أكيد
بس كنت بكدب وأقولك
إني قادر
مع اني عارف إني ضعييييف

كنت بضحك عليك لما وهمتك
إن الحكاية لسه فيها
كنت بعافر
ماسك سيوفي
و في أول معاركي
سيبتيني وحدي
لو تعرفي عمق جرحي
جرحي زي بحر مالوش أرار
زي جنة و نار
هو جاري كل يوم أول ما بصحي
يصبح عليا
و في المسا يمسي
يزدني ألم و مش ينسي
يلين في قلبي و مش يقسي
عرفتي ليه كنت عاوزك تضعفي
عشان حبك حياتي وموتي
حبك شعري وصوتي
فاكراني ولا دبلة خطيبك نسيتكي
اسمي
مش بلومك أو هلومك
أصلي عارف إنك انتي زي ما انتي
ضعيفة زيي
و عشان كده مستغربك
إزاي ضعيفة و متضعفيش
يوم الوداع ؟


ملامحي اتغيرت
ابص في المراية
كأني واحد غريب
حتي الإبتسامة بقالها
فترة غايبة عن ملامحي
وحشاني ضحكتك
أصل ضحكتك ضحكتي
لما بتضحكيها قلبي يطير
و وحشاني نظرتك لما تقاوحي
و لما تكدبي و اعرفك من عنيك
الكدابين و استحلفك انك تسامحي
تسامحي قلبي انه نام
علي لحم بطنه لما نسي
ينام علي طعم صوتك
دلوقتي اتعود يبات
علي طعم جرحي
يمكن لو شوفتيني صدفة
تعدي من جنبي عادي
مش لإنك نسيتي شكلي
بس يمكن شكل الحزن
اللي واكل من وشي حتة
غيّر كتير من ملامحي
قهرتي كل يوم الصبح بدري
لما أكون ممنوع أصبح
عليك لما تصحي
كل ده غيّر ملامحي
عرفتي ليه كان نفسي تضعفي
يوم وداعنا ؟
عشان عارف إن ابتسامتي
مولودة فيكي
و عارف إنك حزينة زيي
يمكن عشان لسه بحبك
حاسس إنك لسه جنبي
لكن بعيدة
و حاسك في يوم
ناوية تِصَلْحي .









1 وشوشوني:

almthalia said...


شركة المثالية للتنظيف بسهات
شركة المثالية الدولية

تواصلوا معنا للحصول علي خدمات شركة المثالية للتنظيف ومعرفة اسعارها المميزة وخدماتها بجميع مدن ومحافظات المنطقة الشرقية علي جوال 0577017188 نصلكم اينما كنتم