حارة الحب

لحد إمتى هفضل على
سطح بيتنا
واقف منتظر

شباكك تفتحيه


و تطلعيلى من بين
الستاير

لحد امتى

هفضل اتعمد صدفة لقانا

و افتعل حجج من غير
دواعى

لحد امتى يكون لقانا
فى الخفى
فى أطراف حارتنا



و يكون القمر بينى وبينك
وسيط

ينقل حكاوينا مع النسيم
ويفشى سرنا
لليالى

امتى أذيع خبر حبنا لاهل الحوارى

و اجرى أوزع على العاشقين
شربات هوانا


امتى يا بنت الحلال
اجيلك فارس همام

على العتب
اخبط على بابك
و ارمى السلام ..

أو أسمعك بتندهيلى
من بعيد
و تقولى فى أعلى صوت

(( بحبه يا ولاد الحلال ))