Monday, June 29, 2009

رماد



و الله يا صاحبى
مش هامننى
تبقى معايا
تبقى ورايا
صورتى ويا
صورتك
موضة قديمة
بعد اللى انا شايفه منك
منستهلش
نبقى صحاب
زى الديابة لما تنهش
فى الجتت
زى الحياة لما تسف من
دم الغلابة
و لما تشفنى يا ريت ما
تلامس ايديا
أصل ايديا بالغدر
منك مكتفية
و ابتسامتى لما
اشوفك من بعيد
و فرحتى لما تلبس
توب الفرح
كل ده أصبح
حلم واتنسى
مش جبن منى
انى ادارى
بس حبى اللى فاضل
منه حبة
خايف يواجهك بالحقيقة
أحسن ينقطع
حبل المحبة
و تفارقنى من
اول دقيقة

يا صاحبى
اقصدى يا اللى
كنت فى يوم
ليا صاحب
ليه نعاتب ؟
ما الباب يفوت
الف صاحب
و بكره تعرف انى
ما كنت خاين
بس اللى انت شايفه
واللى باين
إنى جانى عليك
بعد بكره هيقولك
فوق خلاص
صاحبك مشى
صاحبك اللى من
قبله كنت رماد
دلوقتى إرجع رماد
إرجع لأصلك
يمكن تلاقى ألف صاحب
يمكن تداوى وحدتك
وسط القرايب
بس عمرك ما تلاقى
قلب زى قلبى
و لا عقل
يستوعب كلامك


********************
فاكر لما كنت
بتشتكيلى
لما كان القسى يتنطنط
بين عيونا
و قلبونا تبكى
و نبكى معاها
زى العيال
و يبقى كلامنى نسخة
واحدة
حلمنا نسخة واحدة
لما نتكلم ويا بعض
غربتنا تتقتل ويا الكلام
بس باين إن الحكاية
راحت بالسلامة
اتشبكت فى رجل
اليمامة
اللى هاجرت للشتا
بعد الدفى
اللى كانت فى
شط المحبة
اللى اختفى
صعب ترجع
تانى لشطنا
صعب ترجع أيامنا
اللى عدت مننا
بس افتكرنى
لما تكبر و حياتك
تملاها المشاغل
لانى باقى على
اللى فاضل
اسمك هيتنطق
لما اتسأل مين كانواصحابك
مين اكتر واحد دق
بابك
ابقى افتكرنى
و ردد اسمى
لو إتسألت
لو كنت ساعتها لسه فاكر

22 وشوشوني:

جريدة الصباح العربي said...

انتهينا من اختيار الفائزين في مجالي الشعر والقصة القصيرة وذلك لعددنا الأول ولكن مازلنا نرحب بكل الأعمال لأن المسابقة دورية , من يريد أن تصل أعماله من مدّونته الى جمهور القراء فى مصر والوطن العربي , ارسل لنا أعمالك من قصة وشعر وخواطر الى البريد الألكتروني التالي
arabicsabah@yahoo.com
كما نرحب بمقالاتكم التي ستنشر فور ارسالها على جروب الجريدة وستصبح مفتوحة لمناقشتها بين القراء ... تابعونا على جروب الجريدة
http://www.facebook.com/group.php?gid=78080770039
انتظرونا قريباً في الاسواق
تحياتي
الصباح العربي

عايش... ولكن !!!! said...

هو ايه الحكايه انتوا بتتفقوا مع بعض
كذا مدونه الاقيها بتتكلم عن الصحاب
بس كلماتك مؤثره
نصيحه متحاولش تخسر حد

Sweet Violet said...

بجد قولت كلام كتير نفسي اقوله
v_v

rovy said...

السلام عليكم
الله يا عمرو كلماتك بجد صادقة جدا و حسيتها قوى يمكن علشان لاقيتها بتتكلم بلسانى و احساسى ..
صعب جدا ان يكون للانسان صديق بجد و كانم لهم حلم واحد و مشاعر و افكار مشتركه و يمكن كانوا بيكملوا بعض و فجأه تلاقى نفسك وحيد و الصاحب اللى كان لك طول السنين عنك بعيد .. الفراق بقى محتوم و اللى انكسر صعب قوى تداويه السنين
تسلم ايدك يا عمرو و يارب صاحبك يلحق يفوق و يحس و يرجع لك

تحياتى

Angel said...


السلام عليكم ورحمة الله وبركاته

أزيك يا عمرو؟؟
أتمنى تكون بخير
..............................
المتألق/ عمرو

حرفك رائع بكل نبضه

وكأنك تتحدث عن نفسي

مهما كتبت لن أوفيك حقك

بإختصار

أنت مبدع

تحية معطرة بأريج الياسمين

لبوحك ولروعة قلمك

أختك
Angel Love

وتقبل إعتذاري على طول الغياب

blue-wave said...

كلمات جميله قويه مؤثرة
ومظبوطه ودا الأهم
تحياتى

كتكوته said...

بجد كلماتك اثرت فيا جدا
حسيت انها صادقه اوي
وبيتهيالي ناس كتير مرت في موقف شبه ده
يمكن عشان الدنيا مبقاش فيها امان
متقدرش تلاقي صاحب يحبك منغير اي مصلحه

تقبل مروري

لاسع افندى said...

والله ياصحبى مافيش اصعب
من غدر الصحاب
يخلى القلب من جوه يتعب


تحياتى

الشاعر الحزين said...

يااااااااااه يا عمرو

أنا بزعل قوى قوى لما ألاقى غدر من الصاحب

لأنى شايف ان الصاحب بالذات المفروض يكون هو أحن واحد يشيلك فى وقت أزمتك

لكن بغض النظر عن الموضوع

الا ان كلماتك جميله قوى قوى فى تنسيقها وفى روايتها

بجد رائع يا عمرو

تسلم ايدك

RAZY EL HAWARY said...

لما بنتخدع العيب بيبقى فينا
وممكن قشة تغرق سفينا
بكرة لينا بس نتعلم من ماضينا

إني ملكة .. said...

السلام عليكم ورحمة الله ..

لو مش مجرد كلمات الواحد لازم يحاول بأي طريقه ميخسرش حد قرب منه حد صاحبه
خاصة لما ميكونش مجرد صاحب ..

لابد من الخلافات وكذلك لابد من الصفح والتسامح مهما كان السبب
لأني أعتقد لازم نغفر زلات بعض ..

نعكشة said...

بس عمرك ما تلاقى
قلب زى قلبى
و لا عقل
يستوعب كلامك

مش عارفة
بحس إني عمري مااقدر اقول الكلمة دية لحد
زي اللي نفسي بتقولي فيه الف مليون واحدة غيري ممكن تحبها ( لوصحبتي يعني) أحسن منك بكتير
حتى لو كنتي فاكرة ان حبك ليها كبير
معرفش
للعلم بس انا عمري ما فكرت اني اقولها لحد لإني محستش اني عندي صحاب اصلاً عشان يمشوا و يسيبوني :D أو أمشي و اسيبهم

..................

ما الباب يفوت
الف صاحب

الجملة دية
و بعدها

بس افتكرنى
لما تكبر و حياتك
تملاها المشاغل
لانى باقى على
اللى فاضل
اسمك هيتنطق
لما اتسأل مين كانواصحابك
مين اكتر واحد دق
بابك

محساني انه حتى صعبان عليه يقوله الكلمتين اللي قالهم
ربنا ما يحرم حد من صحابه يا رب
و ما يوريه منهم ساعة غدر او خيانة

آمين

سلام عليك

سفروتة said...

اوقات بنتعلق بناس ونفتكر انهم صحابنا بجد
لكن بعد كده بنكتشف اننا انخدعنا فيهم
صعب جداااااااااا ان البني ادم يلاقي فعلا حد يصاحبه بجد ويكون صديقه الصدوق ممكن يلاقيه بعد محاولات
بس المهمة الصعبة انه يحافظ عليه
يمكن انا عن نفسي شايفة ان اهم واجمل علاقة من العلاقات الانسانية هي الصداقة
بس الصداقة الحقيقية
لاني ببقي عارفة ومتأكدة ان فيه حد فاهمني كويس وعارفني كويس وحافظني كويس
يحس بوقت فرحي ووقت حزني
الحمد لله لقيت الانسانة دي
وربنا مايحرمني منها ابدااااااااا

ـــــــــ
سلم لنا قلمك يا عمرو
لون جديد عليك اللي كتبته المرة دي
او اول مرة اقرأ حاجة بالاسلوب ده ليك
استــــــــــــمر
ربنا يوفقك يارب

ديالا said...

عمرو

بجد رهيبه حكت كل حاجه جوايا كان نفسي اقولها لصاحبه عمري

بجد مكنتش هلاقي كلام احسن من كده

بس واضح ان الاصحاب بقوا حاجه مستحيله

تقبل مروري

عمرو said...

عبرت بكلماتك الصادقه عن كل ما يدور بداخلنا جميعا فشكرا لك ..
تقبل تحياتى و تقديرى ..

أفـــئــدة الـــطـــيـــر said...

أجدت فأبدعت عمرو


حقا كلمات رائعة تصف بها غدر الصديق

وألم صديقه ..

لكني برغم تألمك .. أو ما حدث من غدر

اتمنى لكما العودة قريبا إخوة وأصدقاء

لأنى أدرك جيدا .. أن الصداقة لديك لها قدسية خاصة .. وليس بالسهل أن تذهب هذه القدسية هباءً


تقبل تحياتي ..أفئدة الطير

كيــــــــــــارا said...

كلامك بيوجع

بصراحه ابدعت

صوت من مصر said...

مليش تعليق حاليا على كلامك الهايل لانى مش بفهم فى الشعر
لكن ارضى عنى انى اتابع المدونه وانا غير رومنسى
كيمو

جارة القمر said...

رائع ماورد هنا

مودتي

هبة خميس said...

صاحبك اللى من
قبله كنت رماد
دلوقتى إرجع رماد
إرجع لأصلك
يمكن تلاقى ألف صاحب
يمكن تداوى وحدتك
وسط القرايب
بس عمرك ما تلاقى
قلب زى قلبى
و لا عقل
يستوعب كلامك



جميل قوي الجزء دة
بجد معاك حق فعلا
تحياتي

سفروتة said...

اين جديدك يا عمرو؟؟

بنت مهيسة اخر حاجة said...

لمستني بصدق تلك الكلمات

و بكره تعرف انى
ما كنت خاين
بس اللى انت شايفه
واللى باين
إنى جانى عليك

(ياريت بكرة ييجي ويعرف اني
ما كنت خاين ! )

ــــــــــــــــــــــــ

و يبقى كلامنى نسخة
واحدة
حلمنا نسخة واحدة
لما نتكلم ويا بعض
غربتنا تتقتل ويا الكلام

..............
مش لاقية بجد كلام)

ــــــــــــــــــــــ

بس باين إن الحكاية
راحت بالسلامة
اتشبكت فى رجل
اليمامة
اللى هاجرت للشتا
بعد الدفى
اللى كانت فى
شط المحبة
اللى اختفى
صعب ترجع
تانى لشطنا
صعب ترجع أيامنا
اللى عدت مننا

( فعلا .. معادش ينفع )

ـــــــــــــــــــــــــ

اسمك هيتنطق
لما اتسأل مين كانواصحابك
مين اكتر واحد دق
بابك
ابقى افتكرنى
و ردد اسمى
لو إتسألت
لو كنت ساعتها لسه فاكر

(اسمك هيتنطق وياه دموع
لكن خلصت خلاص
(معادش ينفع رجوع